Vibeke Flesland Havre (f. 1974) er skodespelar, regissør og dramatikar frå Bergen. Ho er utdanna ved Arts Educational School of Acting i London (2000–2003) og har vidare fordjupa seg innan sirkus, akrobatikk og fysisk teater ved Circus Space i London, Rogelio Rivel-skulen i Barcelona, Cirque School i Los Angeles og Sky Candy i Austin. Vibeke har òg lang erfaring med songteknikkar som Complete Vocal Technique og Roy Hart Theatre, og har spesialisert seg i «Method Acting» gjennom mange år hos Jack Waltzer.
Ho har arbeidd med ei rekkje teaterkompani i England, Spania, USA og Noreg. Frå 2009 til 2013 var ho tilsett ved Den Nationale Scene i Bergen, og i 2013–2014 ved Teatret Vårt i Molde. Ho har òg vore knytt til Hordaland Teater, Akershus Teater og fleire kompani i det frie feltet. Som kunstnarisk leiar for Bergen Borgerscene har Vibeke sett opp fire framsyningar i samarbeid med DNS og Festspillene i Bergen, mellom anna Nav Betaler (2019), Lykkeliv (2017/2018) og Det var en gang et menneske (2015).
For tida spelar Vibeke i Politi! 2 ved Det Vestnorske Teateret – ein suksessrik produksjon som har fått terningkast 5. I tillegg til å stå på scena har ho skapt og regissert ei lang rekkje produksjonar, frå familieframsyningar til samfunnsengasjerte prosjekt. For sitt kunstnarskap – både som skodespelar og regissør – mottok ho Pernillestatuetten i 2015. Vibeke har òg fått fleire stipend frå Kulturrådet og Bergen kommune, og undervist i teater både i inn- og utland.
