Det Vestnorske Teateret (tidlegare Hordaland Teater) er eit regionteater og vart etablert i 1988. Teateret har nynorsk som administrasjonsspråk og spelar på nynorsk og dialekt. Det Vestnorske Teateret har ei sterk satsing på bruk av ny dramatikk og ein identitet som er forankra i det vestnorske. Thomas Bye er teatersjef (frå august 2023). Solrun Toft Iversen var teatersjef frå mai 2017-juli 2023.
Drifta vert i all hovudsak finansiert av Staten og den største eigaren Vestland fylkeskommune. Vår eigeninntekt frå billettsal utgjer ca 37 % (2019 tal).
Det Vestnorske Teateret held til i Bergen sentrum (i ærverdige Logen), Ole Bulls plass 6, som ligg like ved den blå steinen. Etter den store utbygginga har vi i det moderne tilbygget fått ein scene 2, samt verkstader.
I vårt flotte teaterhus spelar vi våre framsyningar for publikum i Bergen og tilreisande gjester. Det hender du også finn oss ute på turné i Vestlandsregionen.
Administrasjonen har kontorlokale i Logen (Ole Bulls plass 6, i Bergen sentrum), inngang ved “Den Gode Hensigt”.
På Stend i Fana har vi framleis verkstad/lager.
Teateret legg vinn på å ikkje forureine det ytre miljøet i all si framferd. I august 2022 vart teateret sertifisert som Miljøfyrtårn og kan dermed dokumentere at strenge kriterie innan innkjøp, energi, transport, avfall, utslepp og arbeidsmiljø er tilfredsstilt.
Vi som jobbar ved teateret bryr oss om miljøet, og oppfordrar vårt publikum til å bruke kollektivtransport til og frå Det Vestnorske Teateret i Bergen sentrum.
