Musikalpub

Musikalpub – fredag 6. februar

Tema: Ladies Night!
Gjest: Linn Kathrin Taklo

Ta på deg stiletthelane og glittersminka, for fredag 6. februar er det klart for Musikalpub: Ladies Night – med musikalsongar der kvinner står i sentrum.

Enten du er lidenskapleg oppteken av kvinnekamp, eller berre vil ha ein skikkeleg gøyal kveld, er det berre éin ting å gjere: kom til Skifte og syng den hardaste girl power-låta du kan.Denne kvelden har vi med oss Linn Kathrin Taklo.
Linn Kathrin brenn for musikk og teater, og har lang erfaring som både skodespelar og instruktør. Ho er òg låtskrivar og komponist i Draum Studio, der ho har vore med på å skrive musikk til ei rekkje musikalar og dataspel.

Akkurat no er ho aktuell som låtskrivar for den feministiske musikalen «Olivia – Jenta som oppdaga kva stjerner er laga av», som har urpremiere ved Bergen Musikkteater 14. februar. Som stolt feminist (javisst!) gler ho seg stort til å vere gjest på Musikalpuben nett denne kvelden, når sterke kvinnestemmer skal hyllast.

Anders er sjølvsagt òg med – denne kvelden i ny, betre og meir kvinneleg form.

Så powerwalk deg ned til Skifte for ein kveld av dimensjonar. ALLE er velkomne!
Vi syngast!

………………………………………………………………………………..

Musikalpub – fredag 6. mars – kjem i billettsal!

Tema: På scenen i Noreg i år
Gjest: Lykke Kristine Moen

Lat oss vere ærlege: Det kan vere dyrt å gå i teater. Og er det musikal, kan det vere endå dyrare. Eg (Anders) har, som dykk alle, mang ein gong vridd lommeboka att og fram for å få sett akkurat den framsyninga eg vil.

Men i år treng du ikkje å fortvile. Fredag 6. mars er Musikalpub tilbake, og denne gongen er temaet alt som setjast opp på scenen i Noreg i år. Så om du Les Mis-sar ein Oslotur, eller ikkje får med deg Ungen, har det ingenting å seie. Du får opplevinga på Skifte – til ein brøkdel av prisen. (Faktisk kan du betale det du vil!)

Med oss denne gongen har vi igjen Lykke Kristine Moen. Lykke er ein aktør med lang fartstid i bransjen, og det skal ikkje sjå bort frå at ho sjølv har framført dei fleste musikalane på lista.

Så kva ventar du på?
Det stemmer. 6. mars.
Vi syngast.

Musikalvert og primus motor er Anders Vårdal Gjerde.

• Pianst er Frode Skag Storheim 

Foto av Anders: Motstroen, Andreas Roksvåg