DRAMATISK OPPVÅKNING

Tomas Espedals stykke MARIE MIN er eit scenisk portrett av Marie Hamsun – kjend for mange som kona til Knut Hamsun, antisemitt og landssvikar. Stykket er den høgt akta forfattaren sin dramatikardebut og opnar eit intimt rom kring ei av Noregs mest omstridde kulturhistoriske skikkelsar. Espedal har til no berre skrive prosa, og spranget til dramatikken vitnar om ei ny retning i kunstnarskapen, samstundes som mykje av Espedals litterære signatur blir teken vare på i stykket.

I denne samtalen går Espedal inn på korleis han har nærma seg dramatikken, og kva for moglegheiter det har skapt. Og kva er det ved historia om Marie Hamsun som gjorde at nett dette verket måtte skrivast som drama?

Samtalen undersøkjer sjanger, form og dei kunstnariske vala som ligg til grunn for overgangen frå roman til dramatikk, samt kva for estetiske og etiske konsekvensar denne sjangerendringa inneber. Samtalen blir leia av Elin Grinaker, dramaturg ved Nationaltheatret og medlem av festivaljuryen til Bergen Dramatikkfestival.